'Radhe Shakti Maa' ki Leelaye - Part 20

 

 

 Param Shradhey Pujya 'Shri Radhe Shakti Maa' ko haazir naazir maan kar, jo kahunga – sach ke siva kuch nahi kahunga – Saral Kavi

Main ek sidhi aur upar chad gaya. Jaise jaise main paanchvi manjhil ke karib pahunch raha tha, mere mann mein ajib si khushi, vyagrata aur aanand ki mili juli lehar daudne lagi thi. Sidhiyon mein ek chote se chakor sthan par biche hare rang ke carpet par baithe ek vyakti ne fauran apni note-book  band ki aur furti se uthkar mere aage pankti mein ghus gaya. 

Uski umar lagbhag pachaas ke karib thi, lamba slat color ka kurta, sir ke baal garden tak jhul rahe the. Chehre par kuch sochne ke bhav.

“Jai Mata Di” maine parichay janane ki ichha se vartalabh shuru kia, “Aapka naam jaan sakta hoon mitravar?”

Usne tanik garden meri taraf ghumai. Uski khoi khoi si aakhon mein kuch toh tha jisne mujhe uske prati sahanbhuti dikhane ko majboor kia.

“Suniye mitravar” Usne meri tone mein uttar dia, “Aaya hoon Ullasnagar se, Paanch bhaje nikala tha ghar se,Khub jor se pani barase,Bheeg gaya niche-upar se,Phir bhi bina chinta fikr se, Ho gaya mera yahan tak aana, maksad, ‘Devi Maa’ ke darshan pana, kam hai mera Fruit ka thela lagaana, shuak hai mera likhana- gana, naam hai mera Vishwanath Mastana!”

“wah wah” Maine harshbharit halki hasi ke saath kaha, “kya shayari bhare andaaz mein parichay dia hai! kya baat hai”

“Baat to sirf ‘Radhe Shakti Maa’ ki hai” wah darshnik andaaz mein bola, “Hum to bhai, murkh insaan hai, buraiyon ki khan hai, sacchi baat se anjaan hai, har jagah par baimaan hai, n hamara deen hai na imaan hai, apne swaarth ki pahchan hai, isiliye pareshan hai. Ye toh ‘Shri Radhe Shakti Maa’ meherbaan hai, jo rakhti hamara dhyaan hai, de deti  vardaan hai, ye Vishwanath mangane aaya charno mein sthaan hai”

“Bahut khub” main prashansatmak swar mein bola, “ kuch aur batao apne bare mein, Mastana ji”

“Bachpan mera garibi mein beeta” Mastana Vishwanath phir shuru ho gaya, “Likhai-padhai puri nahi ho paai, ek jhopdi mein umar bitaai, budhe mere baap aur bhai, garibi aur aabhav mein aisi maar lagai, zindagi abhi tak sambhal na paai, ek fruit ke dukaan par naukri karta tha, Raat- din marata tha, phir bhi paapi pet pura nahi bharata tha, Apne nasib ko kossa karta tha, Aankhon se pani bharta tha. Dar dar ki thoakron se kuch n kuch sikhane lagaa, bas issi liye kavitaaye likhne laga”

“thik keh rahe ho”, maine garden hilayi, “Jab bhitaar bahut kuch ekhatta hokar bahar nikalne ko machalta hai, tabhi aadmi shayari karta hai”

“Ekdum sahi farmaya bhai” Vishwanath Mastana ka swar bhari ho gaya, “Mujhe Jahan bhi kisine bataya, Main jane laga, Mandir, Masjid, Dargah, Peer fakir sabhi ko shish jhukaane laga, kabhi toh din firenge apne aap ko samjhane laga, lekin apni mehnat se kabhi muh nahi toda, fruit ki dukaan par naukri karna nahi choda, kyonki agar naukri nahi karta toh kaha jata? Kya peeta kya khaata?”

Vishwanath Mastana apne dil ka dard jaise aaj hi sunane ko betaab tha, “ Phir ek din kayamat hui, ek

‘Devi Maa’ ke bhakt se mulakaat hui usse ‘Shri Radhe Maa’ bhavan mein ho rahi chowki ki baat hui, main yaha aane laga toh ‘Devi Maa’ ki rehmat ki barsaat hui. Dukh ki raat gayi, sukh ki prabhaat hui, mera mukadarr muskuraane laga, ‘Devi Maa’ ne daya drushti aisi ki, maine naukri chod di, aur apna fruit ka thela lagaane laga”

“Majha aa gaya” Maine muskurate hue kaha,”Ismein Tumhari Shraddha aur tumhara vishwaas, tumhari lagan bhi toh mili hui hai” 

“Bhai Sahab, Shraddha, Vishwaas aur lagan ka hi toh saara khel hai, varna har cheez fail hai” Mastana gambhir swar mein bole, “ Main aatut vishwaas aur bhavana ke saath yahan aata hoon, apni baat ‘Devi Maa’ tak pahuchata hoon aur phir nishchint ho jata hoon. Yah bhi ‘Radhe Shakti Maa’ ka hi toh pratap hai, aaj ekdum sukhi mere Maa-baap hai, tuti-futi jhoopadi ko pakka bana liya hai, bijli aur jal lagwa lia hai, jo bhi chaha yahan se paya hai, tangi aur musibaton se nijaat paai hai. Aaram se ghar gruhasthi chal rahi hai, magar umar bhi dhal rahi hai”

Phir  Vishwanath Mastana ka swar dravit ho utha, “Ab toh bas ek hi ardaas lagaane aaya hoon! Bitiya sayani ho gayi hai, uski kahin shaadi lagan ho jaaye, yah var pane aaya hoon. ‘Devi Maa’ toh antaaryami hai. Meri muraad jaroor puri karne wali hai. Meri jholi bharane wali hai. Main issi vishwaas aur yakin se keh sakta hoon ki ‘Radhe Shakti Maa’ apna jalwa dikhlaayegi, meri haalat par taras khayegi, aur ismein sanshay bhi nahi hai ki who ghadi shigrah hi aayegi. Meri beetiya ki shaadi jaldi se jaldi ho jaayegi. Sabka banati bighade kaam hai, ‘Radhe Shakti Maa’ ko pranaam hai"

Main nat mastak hokar uski ardaas jald puri hone ki prarthana karne laga.

(To be continue..)

Note – Priya ‘Devi Maa’ ke bhakto ‘Maa ki leelaye hum nirantar shrunkhala badh prasarit kar rahe hai. Ismein humne ‘Devi Maa’ ke sanidya mein aane wale bhakto ke anubhav ko kalambadha kia hai. ‘Maa ki Leelaye’ aapko kaisi lag rahi hai, Iske bare mein apni rai, apni samiksha, apna sujhav, hame nimn  email par bhej sakte hai..

Aap agar apne anubhav, ‘Devi Maa’ ke apne saath hue chamatkar ko sabke saath baatna chahte hai to hum aapke naam  aur pate ke saath ise pesh karenge. Aap agar chahenge to naam pata jahir nahi karenge aapnki bahumulya pratikriya ke pratiksha mein…

Sanjeev Gupta

Email – sanjeev@globaladvertisers.in